Wy sykje frijwilligers!

/in /by
De Slachtemarathon siket frijwilligers, of eins gasthearen / gastfroulju. De dielnimmers wurde dizze edysje mei bussen nei de start by de seedyk brocht. En no sykje wy minsken dy’t it leuk fine om moarns betiid mei te riden op dy bussen. Om de minsken wolkom te hjitten, miskien sa no en dan wat fragen te beantwurdzjen en om de bussjauffeurs sa no en dan de goeie ôfslach te wizen. Net alle bussjauffeurs komme út Fryslân en kinne wat kennis út Fryslân wol brûke. 😉
 
Wurktiden
De wurktiden binne fan 5 oere moarns oant ûngefear 10.30 oere.
Bist net echt in moarnminsk? Ek foar letter op de dei (fan 9.00 oant ûngefear 20.00 oere) sykje we noch in pear minsken dy’t helpe wolle mei bygelyks it útdielen fan dy moaie Slachtemarathonblokjes by de finish.
Oanmelde
Fynst it leuk om ús te helpen om de Slachtemarathon noch krekt in bytsje moaier te meitsjen? Meld dy dan oan fia info@slachtemarathon.nl. Op sneon 21 maaie om 11 oere ha we in ynformaasjegearkomste foar de frijwilligers. Yn Ljouwert, yn de Blokhuispoort (de âlde finzenis). Soe moai wêze at jim dêr by wêze kinne.

Update oer kaarten, bustiden en starttiden

/in /by

Wy begrip dat jo graach witte wolle hoe let jo starte op 4 juny en hoe let de bus nei de start fuort giet. Dêrom kinne jo dy gegevens no besjen.

Kuierders

De start- en bustiden binne sûnder nammen en adressen, mar wol mei ynskriuwnûmer. Dat nûmer kinne jo fine op it bankôfskrift by de ôfskriuwing foar de kaarten. It nûmer (dat begjint mei in A foar de kuierders) hawwe we dêr ek brûkt. Yn de pdf kinne jo sykje op dat nûmer. De kaarten komme healweis maaie nei jo ta. Se wurde mei de gewoane post ferstjoerd nei it adres dat wy fan jo hawwe. Dat kinne we trouwens net mear feroarje, want alles leit al by de ferstjoerder.

Besjoch it oersjoch (klik hjir en iepenje it bestân)

Dravers

Foar de dravers jilde de neikommende bus- en starttiden.

Starttiid foar alle dravers is 06.30 oere. Alle bussen binne om 05.45 uur by de start.

De bussen geane fuort om:

  • 05.30 oere út Pietersbierrum wei (Tút en der út)
  • 05.00 oere út Ljouwert wei
  • 04.55 oere út Raerd wei
  • 05.35 oere uit Seisbierrum wei (mei fersoarger)

Wy winskje jim in soad wille mei de lêste tariedings!

Nije rûte yn de app

/in /by

Der stiet wer in nije oefenrûte yn de app. De rûte rint troch Gaasterlân en is ûngefear 23 km.  Gaasterlân is ien fan de meast ôfwikseljende gebieten fan Fryslân. Bosken, prachtige fiersichten, de Iselmar, binnen- en bûtendykse polders en unike natuergebieten. It is in gloaiend lânskip tusken de Iselmarkust – mei de ûnnederlânske kliffen – en de Fryske marren.

Let op! We wurkje op dit stuit oan in update fan de app. It kin dus wêze dat de oanwizings en de ôfstân dy’t jim rûn ha net (hielendal) goed wurkje. De rûte is wol te sjen en ek wêr’t je rinne, dus ferdwale slagget net. As jim tips ha of ynput foar de update, dan hearre we dat graach op info@slachtemarathon.nl.

Kaarten keapje? Doch foarsichtich!

/in /by

Fia bygelyks Marktplaats of op in oare wize ien of mear kaarten foar de Slachtemarathon keapje? Us advys: sjoch hiel goed út en doch foarsichtich! Fansels binne der minsken dy’t de kaarten echt ferkeapje wolle, mar der sit ek in oantal charlatans tusken. Twifel? Stjoer in mail nei info@slachtemarathon.nl en we tsjekke it foar dy. Elkenien dy’t kaarten besteld hat, hat in befêstigingsmail krigen. Der binne noch gjin echte kaarten ferstjoerd, dy folgje begjin maaie mei de post. Oh, en hiene we al sein dat dy kaarten hiel moai binne?

Wy sykje muzyk (diel 2)

/in /by

By de eardere edysjes fan de Slachtemarathon koe elk korps of elke muzykgroep him yndividueel oanmelde foar in plakje lâns de rûte. In hiel soad muzikanten hawwe dat ek al dien en dêr binne we hiel bliid mei! Dit jier wolle we lykwols de muzykprogrammearring krekt wat oars foarm jaan.

Op trije plakken lâns de rûte wolle we dit jier nammentlik graach ferrassende kombinaasjes fan muzikanten del sette. We tinke dan bygelyks oan in korps mei in lokale solist/sjonger/ynstrumentalist, in koar mei in dj, in popband mei in trekzakduo, ensfh.

Op dy trije plakken binne yn totaal 12 fan dy bysûndere kombinaasjes programmeard. De optredens duorje ûngefear 45 minuten.

Wat freegje wy fan de muzikanten?

  • Gean op syk nei dy bysûndere kombinaasjes. Dat meist sels dwaan (dan joust jim as kombinaasje op) of kinst dy as selstannige groep of yndividu oanmelde (dan sykje wy mei jim nei kombinaasjes)
  • Tiid, enerzjy en in iepen blik
  • Tink ek ris oan kombinaasjes mei bygelyks tekstskriuwers of dichters
  • Fynst it nijsgjirrich? Jou dy op!
  • Ek ast dy al opjûn hast en it is neat foar dy/jm, dan hearre wy dat graach. Ek dat kin fia it formulier. (En ek dan is der in plakje foar jim lâns de rûte!)
  • Reagearje kin oant 21 maart fia it reaksjeformulier

Wat biede wy de muzikanten?

  • Profesjonele begelieding: de nije kombinaasjes krije profesjonele begelieding
  • Profesjoneel lûd op de 3 plakken
  • In erfaring om nea te ferjitten
  • Ynspiraasje

Tink der oer nei of dit by jim past. It is oars as oare jierren en der wurdt wol wat fan jim frege yn in koarte tiid. Mar it wurdt ek in erfaring om nea te ferjitten. Boppedat kinst der – mei troch de profesonele begelieding en de bijzondere combinaties – in soad fan opstekke en nije ynspiraasje opdwaan.

Tekstskriuwers en dichters
Ek tekstskriuwers en dichters binne wolkom. Sy kinne har ek oanmelde fia it formulier.

Fragen en antwurden

Dizze ynformaasje stiet ek yn in nijsbrief dy’t ferstjoerd is oan alle muzikanten dy’t har al opjûn hawwe. Dêr stiet ûnderyn ek in listje mei meast stelde fragen en de antwurden dêr op. Dy kinne jimme ek trochlêze.

Oefenrûtes op papier

/in /by

Der binne ek dielnimmers sûnder smart phone en dy jouwe oan dat ek sy graach de oefernrûtes rinne wolle. Dat kin fansels! Klik hjirûnder op de dokuminten en dan kinst se sels printsje.

Alle oefenrûtes rinne troch de prachtige natoergebieden dy’t beheard wurde troch It Fryske Gea.

In soad oefenwille!

Oefenrûte februari, Ketlik, 8,4 km

Oefenroute maart, Wolvegea, 14,8 km

Nije oefenrûte is 15 km

/in /by

Oankommende sneon ferskynt der in nije oefenrûte yn de app. Dy rûte is 15 km lang en rint troch de prachtige Lendevallei. In farieard moerasgebiet yn it beekdallânskip fan de Lende en in oase fan rêst, dêr’t bysûndere moerasfûgels in plakje fine: dat is de Lendevallei.

Yn de nijsbrief dy’t hjoed oan alle dielnimmers (kuierders) ferstjoerd is, stiet by fersin dat rûte 25 km is. Us ekskuses!

Wy sykje muzyk en dûns

/in /by

It tema fan de fiifde (!) Slachtemarathon is Feest! En by in feest heart muzyk en dûns, fine wy. Dêrom sykje wy muzikanten en dûnsers. Helpsto mei om de Slachtemarathon ûnferjitlik te meitsjen foar de dielnimmers?

It kin en mei in ferskaat oan muzyk wêze. Fan korpsen oant muzykferienings, en fan slachwurkers oant sjongers en sjongeressen. Elkenien mei meidwaan.

We wolle graach dûnsgroepen ynsette dy’t in dûns dwaan sille mei in flach, de saneamde dûnsjende flaggen.

Dêrom dogge wy in oprop oan alle korpsen, muzykferienings, koaren, yndividuele muzikanten, dûnsers, dûnsgroepen, dûnsklups en dûnsferienings yn Fryslân.

Jou dy gau op!

Wolst meidwaan oan dit spektakel? Jou dy dan gau op. Opjaan kin oant 1 maart 2016 fia it formulier. Dan nimme wy nei 1 maart kontakt mei dy op. We sille dan ek mear fertelle oer wat no krekt de bedoeling is.

Automatyske ynkasso

/in /by

Hawwe jo kaarten besteld foar de Slachtemarathon? Dan hawwe jo ús tastimming jûn foar automatyske ynkasso fan it ynskriuwjild fan jo bankrekken. It totaalbedrach sil tusken ein jannewaris en heal febrewaris 2016 fan jo rekken ôfskreaun wurde. It is handich as der dan genôch jild op jo bankrekken stiet. It bedrach wurdt net by elkenien tagelyk ôfskreaun, mar yn ferskate groepen. It is dus mooglik dat it bedrach by de ien al ôfskreaun is en by in oar noch net.